نسرين طارق تكتب: لا تفتح رابط نتيجة الثانوية.. الرابط فيه سم غير قاتل
في مثل هذا الوقت كل سنة تتبارى المواقع الإخبارية وغير الإخبارية في ابراز عنوان رابط نتيجة الثانوية العامة.. والمفارقة ان هذا الرابط بعد انتهاء الامتحانات بعدة ساعات!
بالعقل والمنطق.. هل النتيجة هتظهر بعد ساعات من انتهاء الامتحانات.. احترموا عقولنا شوية.
ليه المواقع بتعمل كده؟ استغلال لحالة القلق عند الطلاب واولياء امورهم على مستقبل ولادهم اللي بيدفعهم يفتحوا الرابط يمكن يلاقوا اسم ابنهم وصورته في الرابط.
لكن الناس مش بتتعلم.. كل مرة يلاقى جملة رابط النتيجة.. اتوماتيك يفتح الرابط وبعد ما يدخل الموقع يلاقى الخبر بيطلع لسانه ويقوله.. ضحكت عليك النتيجة لسه لم تظهر بعد.. لما يخلصوا تصحيح، والوزير يعتمدها هنزلها أكيد.
الموقع اللي يعمل معاك كده مرة في نتيجة الإعدادية والدبلومات الفنية والثانوية وغيرها من النتائج.. أعرف انه موقع مش بيحترم عقلك كقارئ.
موقع بيستغل قلقك وخوفك علشان تدخل الموقع وتزود عدد المشاهدات على حساب اعصابك واحترام عقلك.
نتائج السنوات الحاسمة زي الثانوية العامة بالذات لما بتظهر كل الناس بتعرف انها ظهرت ومع التكنولوجيا الحديثة الطلاب بيعرفوا رابط النتيجة من غير ما يفتحوا المواقع اللي بتكتب الحق رابط نتيجة الثانوية بالاسم ورقم الجلوس.
ممكن تهدى ومتفتحش الرابط.. الرابط بجد فيه سم غير قاتل.. سم إعلانات هتتفرض عليك لمجرد انك قلقت وفتحته، واهو موسم والكل بيسترزق.
