كلام غير كروي على الاطلاق..

كتب: د/ تامر حسن

فابريزيو رومانو الصحفي الرياضي الإيطالي الأشهر عالميا كتب عنوان قلب بيه الدنيا رأسا على عقب بيقول فيه.. كريستيانو رونالدو في ريال مدريد و ٧٢ مليون يورو تحسم الصفقة!!

بعد ما الدنيا اتقلبت حرفيا بالعنوان ده تيجي تقرأ الخبر يطلع مقلب كبير.. دول خبرين مش خبر واحد..

كريستيانو رونالدو يتدرب الآن في ملاعب ريال مدريد لحين التعاقد مع نادي في انتقالات يناير.. و ٧٢ مليون يورو تحسم صفقة اللاعب البرازيلي الشاب اندريك فيليبي لريال مدريد من بالميراس البرازيلي.

شفتوا بقا العناوين ممكن تكون خادعة ازاي؟؟

تعرفوا ان فيه صفحات أنشئت من محبي الريال ورونالدو هدفهم جمع مبلغ ٧٢ مليون يورو لتقديمهم لفلورنتينو بيريز رئيس ريال مدريد عشان يجيب رونالدو يلعب ويعتزل في النادي بعد ما قروا العنوان؟؟

اه والله..

وده مين.. فابريزيو رومانو شخصيا.. ما بالك بقا ببوستات الفيسبوك الهبيدة، وصفحات متعرفش مين بيديرها، وقنوات متعرفش مين بيمولها.. وكله بيلعب على عناوين اثارية تعمل ريتش وترافيك عالي.. عشان كله بيقرا عناوين بس، ويشير ويتعامل ويتعصب بقا وياخد مواقف.. من غير ما يحاول يقرا الخبر..

أنا مبقولش يدور ورا صحته.. يقراه بس..

خلوا بالكوا يا جماعة.. اقروا المقالات والبوستات للآخر قبل ما تتفاعلوا معاها.. وماتخلوش حد يسرح بيكوا.. حتى لو كان فابريزيو رومانو..