تعرف ان جرثومة المعدة، او الميكروب الحلزوني، او ال H. Pylori ، سميه زي ماتسميه، موجودة عند اكتر من نص سكان الأرض؟
لا مش دي المعلومة، تعرف ان اللي عندهم الميكروب الحلزوني دول ٧٥٪ معندهمش اي اعراض اصلا حتى لو كان الميكروب مش خامل؟
من أكتر الأخطاء الطبية شيوعا عند المرضى وبعض الأطباء كمان اننا نفضل نفني عمر بحاله في محاربة الميكروب الحلزوني على اعتبار انه هو سبب كل الاعراض اللي بيحس بيها العيان، وان هو حل اللغز واجابة الفزورة، ويطلع المريض عنده بلوة تانية ممكن تصل لسرطان المعدة واحنا مش واخدين بالنا عشان بقالنا سنتين بنحارب طواحين الهوا اللي اسمه الميكروب الحلزوني ومش بندور على اسباب اخرى.
الميكروب الحلزوني بيعيش في مخاط او خلايا المعدة وبتنتج انزيم اسمه urease بيكسر اليوريا ويطلع منها أمونيا ammonia بتخلي الوسط حوالين الميكروب قلوي فيحميه من حمض المعدة عشان كده بيعيش كتير، وده تفسير تشخيص الميكروب الحلزوني عن طريق التنفس بالبحث عن الامونيا في الهواء الخارج من المعدة بطريقة معملية معينة بإستخدام ذرة كربون مشع.
يبقى معنى الكلام ان الميكروب الحلزوني مش خطير بقا ومالهوش اضرار؟
الإجابة لأ طبعا، له اضرار، و ١٥٪ من المصابين بيه بيتعرضوا لقرح المعدة والأمعاء، دي قرحة الإثنى عشر سببها الأغلب والرئيسي بيبقى الميكروب الحلزوني. لكن فيه ٨٥٪ من اللي تحليل البراز او التنفس بتاعهم فيه ميكروب حلزوني مش مسببلهم مشكلة، واعراضهم بتبقى بسبب مشكلات تانية لم نجتهد في البحث عنها على اعتبار اننا خلاص وصلنا للسبب.
يبقى النصيحة النصوحة كالآتى.
لما تحس بأعراض انتفاخ او الم في المعدة او سوء هضم او مغص او تجشؤ (تكريع مستمر)، لازم تكشف، وتحلل ميكروب حلزوني في البراز او التنفس، تحليل الاجسام المضادة في الدم مالهوش علاقة بوجود نشاط حالي للميكروب.
لو طلع التحليل ايجابي، يبقى ناخد علاج حسب وصفة الطبيب، بيبقى علاج ثلاثي او رباعي، بالمضادات الحيوية و مثبطات افراز حمض المعدة.
لكن بعد اسبوعين، لو لسه الاعراض موجودة، حتى لو متابعة تحليل الميكروب الحلزوني طلعت ايجابية، نستمر في علاجه ماشي، لكن لازم لازم لازم عزيزي الطبيب وعزيزي المريض نبدأ البحث عن اسباب اخرى للاعراض ومانخليش الميكروب الحلزوني يخدعنا ويبقى زي اللي بيتستر على مجرم او بيشيل عنه التهمة، نعمل تحاليل اخرى واشعات ومناظير معدة وامعاء عشان نقدر نوصل للسبب الحقيقي.
