نسرين طارق تكتب: العاصمة الإدارية الجديدة والفشخرة
العاصمة الإدارية فيها أطول ساري علم في العالم ودخل موسوعة جينيس، ده بالذات فشخرة هنعمل إيه بساري العلم اذا كان أطول ولا أقصر.
العاصمة فيها أكبر مسجد وأكبر كنيسة.. ليه اكبر؟ ما نعمل مسجد حلو وكنيسة كويسة وخلاص ولا لازم الفشخرة؟
واخر الاختراعات.. اكبر نجفة وندخل بيها موسوعة جينيس.. هتنور مصر كلها النجفة دي؟
كل حاجة بتتبني في العاصمة لازم تكون أكبر وأطول وأثقل، وأفعل تفضيل في كل تفصيله فيها.. وطبعا موسوعة جينيس قاعدة منتظرة العاصمة واي حاجة بتحصل فيها عشان تسجل إنجازات العاصمة، اعتقد انه في باب مخصوص في موسوعة جينيس للعاصمة الإدارية لوحده.
طبعا كلنا شايفين مظاهر البذخ والبهرجة في العاصمة وكل ما يحصل جديد فيها نقول ايه لازمتها الفشخرة دي واحنا دولة فقيرة.. بنقترض من البنك الدولي عشان نتفشخر بأكبر نجفة وأعرض كوبري وأطول ساري؟
في الحقيقة لو بصينا في المراية هنلاقي ان دي تركيبة الشعب المصري.. شعب نزيه بيحب يعمل كل حاجة افضل حاجة.. لما عملنا حضارة كنا أول حضارة في التاريخ، وأول كل الاختراعات، واطول مبنى في العالم زمان كان الأهرامات.. وحتى في وضعنا الاقتصادي الحالي في حياتنا البسيطة لما بنعمل حاجة بنعملها بصيغة أفعل تفضيل.. اكبر مائدة رحمن.. اغلى جهاز عروسة لبناتنا، وغيره وغيره.
هي دى حياتنا وتصرفاتنا.. دايما بنحب نكون الأفضل ونعمل كل حاجة الأكبر والأطول.
ولو شوفنا الموضوع من زاوية تانية هنلاقى الدولة بتفكر صح.. السياح لما بيحبوا يزوروا بلد بيشوفوا الأول البلد فيها ايه.. مثال على كده برج خليفة أطول برج في العالم ناس كتير بتروح دبي عشان تتصور عند برج خليفة.
المستثمرين لما بيفكروا يضخوا فلوس في مشروعات في أي دولة دايما بيشوفوا الدولة الكبيرة الى فيها فرص استثمار اكتر وربح أعلى يعني هنرجع تاني لأفعل تفضيل.
العاصمة الإدارية فشخرة.. بس مش كدابة.. مدينة جديدة من مدن الجيل الرابع فيها كل حاجة افضل.. واحنا كمصريين بنحب نتفشخر.. الرئيس عملنا حاجة نتفشخر بيها.. عاصمة جديدة كتير من معالمها داخلة موسوعة جينيس.. من حقي اتفشخر اني مصرية حفيدة حضارة عمرها اكتر من 7000 سنة وعندي عاصمة قديمة فيها أكبر متحف في العالم هيفتتح قريب، وعاصمة جديدة فيها أطول ساري علم واثقل نجفة، ولسه صفحات موسوعة جينيس منتظرة انجازاتنا الجاية.. ونعيش ونتفشخر اننا بنبنى بلدنا.. مش داخلين الموسوعة من باب أقل ولا أقصر.. داخلينها من الباب الواسع ورافعين راسنا في السما.
