يوستينا نبيل تكتب: تفتكر عندك فوبيا؟!
كتبت: يوستينا نبيل
في يوم جتلي بنتي اللي عندها ٧ سنين صارحتني انها كانت خايفه تنام لأنها اتفرجت على ڤيديو خوفها كان عباره عن طوبه بتتكلم وهي شكلها وحش ” على حد تعبيرها” وبتأمر اللي حواليها يقتلوا بعض وفعلاً بيقتلوا بعض.
رد فعلي كان اني سألتها ببساطه ” هي الطوبه ممكن تتكلم؟! هل دا بالنسبالك منطقي؟!” ضحكت وقالتلي لأ بس برضه انا خايفه وبقيت شايفاها في كل مكان ومش عارفه انام.
وهنا قررت اعملها واحد من التقنيات اللي اتكلمت عليها المقال اللي فات رغم ان كان بيتقال انه صعب يتعمل للأطفال عشان تركيزهم بس قولت هجرب اكيد لو حتى منجحش مش هخسر! والحقيقه ان النتيجه كانت مبهرة ولسه صوت ضحكتها وهي بتقولي انها خلاص مبقتش شايفه الصوره اللي بتخوفها ديه مالي كياني وزادني ايمان بأهمية اللي بعمله.
ودلوقتي خلينا نكمل موضوعنا عن الفوبيا يمكن تلاقي عندك نوع منهم وتحب تتغلب عليه، لكن بعض الناس متعرفش انها عندها فوبيا، وعشان كده اتكلمنا ان الفوبيا ليها أنواع كتيره وانها هي الخوف الغير مبرر من الأشياء، لأن الخوف في حد ذاته هو غريزة طبيعية تحمي حياة الإنسان من “الخطر”،
أما الفوبيا عبارة عن خوف غير منطقي من أشياء لا تمثل أي خطورة حقيقية على حياته، منها البسيط والاجتماعي والمركب.
اولاً ؛النوع البسيط وهم ٧٠ نوع لكن هنتكلم عن أشهرهم .. كالخوف من الكلاب وهو عند ٧٥٪ من البشر “السينوفوبيا”، التعابين وهو عند ثلث البشر ” الافوديوفوبيا” ، والخوف من العناكب ونسبته في البشر ٦.٥٪ “الأراكنوفوبيا” ، الخوف من البط “أناتيدافوبيا” ويشعر المصاب انه مراقب من البط ، والخوف من الفراشات “لبيدوبيتروفوبيا” ، الخوف من الرعد يبدأ في الطفولة وغالباً ينتهي في مرحلة البلوغ “أسترافوبيا” ، الخوف من الأمراض “نوزوفوبيا” مرتبط بالوسواس القهري ؛يعتبر الشخص ان اي مرض ولو بسيط هو دليل على مرض خطير يؤدي الى موت ، الخوف من المرتفعات “اكروفوبيا” نسبته ٥٪ من البشر ، الخوف من النوم “هيبنوفوبيا” لوجود إحتمالية رؤية كوابيس وهو مرتبط بالأرق ، الخوف من الجديد “تكنوفوبيا” الخوف من اي شيء معقد يحتاج لتفكير حتى ولو لعبة ، الخوف من الزواج “جاموفوبيا” ينتشر بنسبة اكبر عند الرجال.
ثانياً ؛النوع الاجتماعي، وهما نوعين يمكنهم إعاقة وتعطيل عمل الإنسان الاجتماعي وتواجده بين الناس ؛ الخوف من التحدث أمام الجمهور “جلوسوفوبيا” يخاف الشخص من التعرض للاستهزاء والاعتراض او اي مجهول قد يواجهه اثناء حديثه، والخوف من الاماكن الواسعه المزدحمة ” أجروفوبيا” هنا يرفع الشخص شعارات “كالا مفر لا هروب من المكان “قد افقد الطريق ” وبالتأكيد يفضلون البقاء في المنزل كنوع من الشعور بالأمان.
ثالثاً النوع المركب وهو نوعين او اكثر مدمجين الخوف من الطيران “الإيروفوبيا” ٦.٥٪ من البشر يعانون منهم وهو خوف الاماكن الضيقه مع خوف من المرتفعات.
ازاي بتتكون الفوبيا واعراضها و ازاي تقدر تتغلب عليها بنفسك ومع المختصين دا موضوعنا المره الجاية.
موضوعات ذات صلة:
