كم مرة تكررت كلمه “شيبسي” منذ بدأ تريند الطفلة هايدي؟
رغم أننى لست من مؤيدي المقاطعة.. ولكن تريند الطفلة سخيف ومبالغ فيه وأعتقد أنه ترند مصطنع لكسر المقاطعة، عن طريق تعمد عمل ارتباط شرطي بين الشيبسي وعمل الخير.
ما حدث استغلال تصرف طفولي برئ في دعاية غير برئية لشركة كبيرة؟
ظهور إعلامي مبالغ فيه لطفلة فعلت ما يفعله الكثيرين يوميا بالفطرة.
وكيف وافق أهل الطفلة على ظهور ابنتهم بالشكل المبالغ فيه والمنفر في ذات الوقت! ظهور في المطاعم و محلات العصير و محلات الحلويات ومواقع التواصل الاجتماعي ومقابلة الفنانين، لدرجة الواحد بقى حاسس انها هتنزله من الحنفية.
وما يؤكد وجهة نظري أن الراجل المسن الغلبان مفيش مطعم ولا محل عصير ولا اي حد عبره بكوباية شاي حتى!!
طيب اعملوا خير بجد وكملوا سلسلة الخيرات اللى طفحت عليكم واشتروا جلابية كويسة الراجل الغلبان، ولا علشان عمل الخير هيبوظ التريند؟
الفكرة الاساسية للتريند هو عمل ارتباط شيبسي بعمل الخير و انه الاختيار المفضل لأطفال مصر، وثمن كيس الشيبسي ينفع يبقى عمل خير الدنيا كلها بتتكلم عنه.
وبالنسبة للناس حراس الفضيلة.. ليه مفيش انتقاد للطفلة أنها بتشتري براند مقاطعة، ولا المقاطعة واخدة إجازة علشان التريند يعدي؟
اوجه اللوم الشديد للمجلس القومي للأمومة والطفولة، ماذا قدمت هايدي حتى تستحق التكريم والحفاوة.. في أطفال كتير بيجمعوا مصروفهم لشهور ويتبرعوا بيها لمستشفى سرطان الأطفال.. مسمعناش عن تكريم ليهم، أطفال كتير شغالين وبيساعدوا أهاليهم في مصروف البيت ولا علشان دول مشتروش شيبسي؟
المصريين بيعملوا موائد إفطار في رمضان تكفي دول، يعنى عمل الخير ومساعدة الفقراء مش حدث استثنائي عندنا.
اللي بيحصل ده تغييب للوعي، ومحاولة صنع وعي جديد بيحركه التريند، مع تركيز إعلامي غير مبرر، الا كونه عودة البراند المقصود بلبس جديد بعد المقاطعة، تريند بخمسة جنيه.. يا بلاش.
