إبراهيم عكاشة يكتب: صاحبك الجدع.. مش جدع المجتمع اختل مننا وتوهنا ومش عارفين بقت إيه هي معايير الرجولة والجدعنة أو الحلو من الوحش.عايزين نحط معايير جديدة لشوية توصيفات إحنا عايشين بيها وبنستخدمها.
التوصيفات دي بقت مضللة وإوعى تصدق لما حد يقولك على حد إنه جدع، هو جدع من وجهة نظره بس هل هو قالك عليه مثلاً إنه جدع علشان في مرة كان بيتخانق فقام صاحبه دا دخل معاه الخناقة يضرب في الناس؟ طيب مش يمكن انت ظالم؟ مش يمكن بتضربوا انتو الاتنين في شخص برئ؟ يبقى جدع ازاي؟ أنا أعرف إن الجدع دا بيبقى حقاني وعلشان كدا الناس شايفاه جدع، غير كدا مايبقاش إسمه جدع.. إسمه شريكك في البلطجة.
المعايير اختلت ومابقيناش عارفين مين يقصد ايه! طيب لما حد يقولك على حد إنه رجولة! هو شايفه إنه رجولة علشان ضرب أخته مثلاً أو مراته..دي كدا رجولة؟! دي ذكورة.. ويشوبها المرض النفسي كمان مع قلة تربية.لما حد يقولك على مدرس مثلاً انه رخم طيب رخم في إيه؟هتلاقيه رفض يغشش العيال في الامتحانات، يقولك دا في ظابط مرور رخم واقف في اللجنة طيب رخم ليه يا عم؟أصله بيلم رخص المخالفين، أمال أنت عايزه يلم رخص اللي ماشيين صح؟! أنا شخصياً مابقتش أثق في توصيف أي حد لحد، لازم أتعامل بنفسي علشان أعرف هو جدع ولا رخم ولا ايه حكايته..،بس مش هي دي المشكلة.. ما انت هتكتشف هتكتشف، المشكلة إن المعايير أُختلت، فين الصح وفين الغلط؟ توصيفنا أصلاً للصح والغلط بقى مريب، دا إن دل على شيء فيدل على إن المجتمع اتشقلب حاله وبقى مختل هناك حول مجتمعي يا سيدي الفاضل.
طيب في أمل لإرجاع الأشياء لأصلها؟ أكيد بس تقدر تعمل دا؟ تقدر تستخدم الدراما والإعلام في دا؟أشك بنظرة سريعة في الدراما تلاقي الجدع بقى هو اللي بيشيل قضية المخدرات بدل صاحبه.. أو بيروح يضرب الشخص اللي مضايق صاحبه.لما تعدل دي بس في الدراما يبقى في أمل.صاحبك الجدع هو اللي يوجهك للصح والأصول.. مش اللي يتخانقلك.طيب في الإعلام..بتلاقي مستضيفين واحد بيقولوا عليه تيكتوكر!يا صلاة النبي بتاع ايه الحاج دا؟بيرقص بكرشه مثلاً.وكأني بوجه العيال إن اللي بيهلس على التيك توك بنستضيفه وبيبقى نجم مجتمع وبيبقى هو النموذج الملهم لعيالنا!.الإعلام بيصدر لعيالنا إن هما دول النجوم وهما دول المشاهير، بالمناسبة.. أنا جيل أدهم صبري بطل الدكتور نبيل فاروق الله يرحمه.. جيلي بس اللي هيفهم ويعرف مين أدهم صبري، شوفت المعايير راحت فين؟شوفت إحنا بنقرأ إيه وبنشوف مين، وولادنا بيشوفوا مين؟شوفتوا نجومنا من نجومهم؟!طيب مفيش مرة الإعلام يغلط ويجيبلنا حتى طقم الأطباء الشباب اللي دخل عليهم واحد ايه اتقطعت ودخلوا بيه العمليات 12 ساعة لغاية ما رجعوله إيده المقطوعة؟!يعني حتى مرة كدا بالغلط نوري عيالنا شباب حلو اياكاش تصحولنا حتى بقلظ ولا بوجي وطمطم.. والله كانوا بيعلمونا الصح من الغلط بس طبعا خلاص مفيش يا بيه الكلام دا أنت ترقص بكرشك أو بأي حاجة بتتهز وتيجيلنا علشان نعملك نجم مجتمع.
عيدوا صياغة المجتمع ووجهوه من أول وجديد علشان الدنيا ساحت خالص على بعضها وبقينا فاهمين كل شيء بالمشقلب، علموا عيالكم الجدعنة الصح والرجولة الصح وعرفوهم إن المراقب بتاع الامتحانات اللي رفض يغششهم دا راجل جدع خايف على مستقبلهم، مش رخم زي ما بقى الحال دلوقتي، علموهم إن الرجولة إنه ما يضربش أنثى بالذات لو كانت أخته أو مراته، علموهم إن اللي بيشوف شغله وبيطبق القانون، دا شخص محترم مش رخم، علمه بقى أهم حاجة.. إن اللي بيشوفه في التليفزيون مش هو دستور حياته اللي المفروض يمشي عليه أو يقلده.
اتكلموا مع عيالكم واعمل لهم حائط صد أمام أبطال المسلسلات اللي هما مش أبطال ولا حاجة، قولهم على البطل الحقيقي بيبقى شكله ايه قبل ما يكبر وهو فاهم كل حاجة غلط ويعمل معاك انت نفسك الغلط.
