نسرين طارق تكتب: السادة متابعي التوك شو.. احترس وعيك في خطر
لما تكون فى مكان الجو فيه حر جدا وانت زهقان وحد يرش عليك مياه ساقعة اوى أو يحط فى قفاك قطعة تلج.. تفتكر ايه احساسك وقتها.. طبعا هتحس بالصدمة.
هو ده نفس احساس لحظة اكتشاف الحقيقة بتكون مصدوم وبتاخد وقت علشان تفوق وتقدر تفهم ايه اللى حصل.
ليه بقول لمتابعي برامج التوك شو ان وعيهم في خطر.. لان طبعا كل واحد من حضراتكم بيتابع برنامج معين والمذيع طول الوقت بيأكد ان برنامجه بينفرد بالحقيقة وبيعرض الواقع.
لما تقارن كلام التوك شو بالواقع تلاقي نفسك مصدوم نفس صدمة لحظة اكتشاف الحقيقة.
في عالم موازي.. برامج التوك شو اللى بيقدمها الاخوان بتأكد لكم ان السيسي باع سينا وقبض التمن وحطه في الحصالة.. وعمل تمثيلية المظاهرات الشعبية الرافضة لتهجير الفلسطينيين فى سينا علشان يزود سعر الصفقة (اللى المذيع اكد انه باع وقبض التمن خلاص).
يعنى هو باع ولا لسه بيفاصل؟!
مع ان مفيش اى جهة رسمية او غير رسمية قالت الكلام ده.. هما كدبوا الكدبة وصدقوها.. وبيزن عليك طول الوقت علشان تصدقها.. معتمدين على تكرار الاشاعة بيحولها لحقيقة عند الناس.. وعندنا مثل مشهور على كده.. السيسي اتقتل واللى موجود ده الدوبلير.. السيسي امه يهودية.. بيفضلوا يرددوا الشائعات دى فى برامجهم لحد ما تتحول مع الوقت لحقيقة بنبنى عليها كلام تانى.
من فترة مذيعي التوك شو المعارضين مسكوا الربابة زن على ودان الشعب.. ليه السيسي بيشترى السلاح ده كله.. وحاليا اتغيرت النغمة يلا نحارب ما احنا عندنا سلاح كتير (بدل ما يصدي!) .
يعنى بيطالبوا السيسي يحارب في فلسطين.. مع انه سبحان الله نفس السبب اللى بينتقدا الرئيس الراحل عبد الناصر علشانه (حرب اليمن) ولا نسينا!
جيش المكرونة.. جيش الجمبري، ده كان الكلام اللى بيرددوه فى برامج التوك شو علشان يغير وعيك ويخليك تشك فى جيش بلدك وانه جيش لا يصلح للحروب ولا حتى للدفاع عن الوطن وحدوده.. فى الاخر هو جيش مكرونة ولا جيش يقدر يحارب؟.
هي دي اللعبة مذيعي برامج التوك شو اصبحوا يمتلكوا ريموت كنترول الوعي.
احترس من التوك شو.. وركز انت مواطن مصري بوصلتك مصر وامانها واستقرارها.
